Íslandsmeistaramótið í CrossFIt er hafið – Sigurvegararnir krýndir á sunnudag
Íslandsmeistaramótið í CrossFIt fer fram um helgina. Það hófst í gær. 52 konur og 53 karlar keppa um titlana hraustasta kona og hraustasti karl Íslands. Mótið fer fram í Crossfir Reykjavík, Sundlaug Kópavogs og íþróttahúsinu Digranesi í Kópavogi. Þetta kemur fram í tilkynningu frá aðstandendum mótsins.
Þar kemur fram að 253 einstaklingar hafi tekið þátt í undankeppni fyrir mótið en á meðal þátttakenda eru fremsta keppnisfólk Íslands í CrossFit. Í tilkynningunni segir að á meðal keppenda séu Þuríður Helgadóttir, Oddrún Eik Gylfadóttir, Sigurður Hafsteinn Jónsson og Hinrik Ingi Óskarsson. Þau muni vafalaust gera harða atlögu að titlum í sínum flokkum.
„Keppt verður í fimm kvenna- og karlaflokkum á mótinu, sem skiptist í opin flokk, karla- og kvennaflokk 35-39 ára, karla- og kvennaflokk 40-44 ára, karla- og kvennaflokk 45-49 ára og svo í flokkum karla og kvenna sem eru 50 ára og eldri.“
Þá segir að áhugi Íslendinga á CrossFit þurfi ekki að koma í óvart í ljósi þess hve Íslendingar hafi náð góðum árangri í greininni á erlendri grundu. Íslendingar hafi í fjórgang eignast heimsmeistara kvenna á CrossFit-heimsleikunum í Carson í Kaliforníu. „Annie Mist Þórisdóttir hefur tvívegis sigrað heimsleikana og Katrín Tanja Davíðsdóttir jafnaði svo það met þegar hún var krýnd hraustasta kona veraldar á heimsleikunum í sumar.“
Þá er skemmst að minnast þess að Björgvin Karl Guðmundsson hafnaði í þriðja sæti í karlaflokki á heimsleikunum fyrr á árinu, sem og á síðasta ári. Um 2.500 manns iðki sportið á Íslandi.
„Sigurvegarar mótsins í öllum flokkum verða krýndir kl. 17:00 í Digranesi á sunnudaginn. Dagskrá og nánari upplýsingar um mótið er að finna á heimasíðu CrossFitsambands Íslands, www.cfsi.is.“