„Okkur er öllum brugðið. Við gátum ekki ímyndað okkur að kennari við skólann myndi gera svona“
Landafræðikennari sem kenndi grunnskólabörnum í skóla einum í Rúmeníu hefur verið rekin úr starfi eftir að í ljós kom að hún hafði starfað á öðrum og öllu vafasamari vettvangi en við kennslu.
Kennarinn, hin 27 ára Georgiana, kenndi landafræði í grunnskóla í bænum Prisacani. Í ljós kom að hún hafði leikið í klámmyndum, en fjórtán ára nemandi hennar rakst á myndbönd og myndir af henni á veraldarvefnum. Nemandinn deildi efninu með skólafélögum sínum þaðan sem það komst í hendur stjórnenda skólans.
Í fréttum rúmenskra fjölmiðla, sem breska blaðið Mirror vitnar til, kemur fram að skólastjórinn, Mariana Catrina, hafi hafið rannsókn á málinu. „Okkur er öllum brugðið. Við gátum ekki ímyndað okkur að kennari við skólann myndi gera svona,“ segir Mariana sem bætir við að viðbrögð kennarans í fyrstu hafi verið þau að halda því fram að myndirnar væru falsaðar.
„Við lítum þetta mál alvarlegum augum enda stríðir það gegn siðareglum skólans,“ segir Mariana. Þá er haft eftir ónafngreindu foreldri barns við skólann að það sé í sjálfu sér ekkert athugavert við það að fólk kjósi sér þann starfsvettvang sem því hentar. „En þú getur ekki unnið við að kenna grunnskólabörnum á sama tíma,“ segir umrætt foreldri.
Skólayfirvöld buðu Georgiönu að segja upp störfum sem hún og gerði.