Reyndu að fjarlægja hann með gaffli og grilltöng – Deildi öllu saman á Facebook og vill opna umræðuna
Bresk kona, hin 24 ára gamla Emma Philips, þurfti nýverið að gangast undir skurðaðgerð til að láta fjarlægja kynlífsleikfang úr endaþarmi sínum. Um var að ræða sjö tommu gervilim sem festist. Nokkrir breskir miðlar fjalla um málið, þar á meðal Daily Mail.
Það var snemma á laugardagsmorgun sem leikar æstust í svefnherbergi þeirra Emmu og Lee Miller, kærasta hennar. Að einhverjum atlotum liðnum hvarf gervilimurinn, en hún deildi frásögn sinni af málinu á samfélagsmiðilinn Facebook, að sögn til að fyrirbyggja að aðrir lendi í því sama.
Hún greinir frá því að fyrst um sinn hafi hún haldið að kærasti sinn væri að fela fyrir sér leikfangið, en ekki liggur fyrir í smáatriðum hvað á hafði gengið fram að því. Þau héldu svo að limurinn hefði dottið út en leituðu af sér allan grun. Þegar Miller fór að þreifa á kvið sínum fann hún fyrir leikfanginu innvortis. Ekki bætti úr skák að dildóinn, sem við skulum kalla svo, var stilltur á titring.
Þau skötuhjú dóu ekki ráðalaus heldur reyndu að ná leikfanginu út og notuðu til þess meðal annars gaffal og grilltöng. „Lee datt alls kyns snjallræði í hug. Hann reyndi að nota handfangið af gaffli – sem við notum ekki aftur – og sagði á einum tímapunkti að hann fyndi fyrir honum. En hann reyndist of langt uppi – hann var farinn,“ segir Miller hreinskilin. „Hann reyndi líka að nota grilltöng, í um klukkutíma, en smám saman rann það upp fyrir okkur að við þyrftum að fara á sjúkrahús. Okkur var báðum svolítið brugðið.“
Segir ekki meira af húsráðum þeirra hjónaleysa en á sjúkrabíl hringdu þau. Þannig vildi nefnilega til að þau höfðu bæði fengið sér í glas kvöldið áður og voru óökuhæf. „Sá sem svaraði bað mig að segja sér nákvæmlega hvað amaði að, svo það varð ég að gera.“
Á spítalanum voru teknar af henni röntgenmyndir. Læknarnir sáu að dildóinn var svo innarlega að það yrði of sársaukafullt að gera tilraun til að ná honum á hefðbundinn hátt út. „Þeir grínuðust með þetta til að byrja með en gamanið kárnaði þegar þeir sögðu mér að þeir gætu þurft að sækja hann í gegn um kviðarholið.“ Henni var líka sagt að ef til þess kæmi yrði hún að bera stómapoka í að lágmarki sex mánuði.
Hún segir að þeir hafi sagt að svona vandamál kæmi oftar á borð til þeirra en fólk grunaði.
Af spítalanum skrifaði Miller á Facebook, fyrir alla þá sem lesa vildu, að svolítil gleðistund í morgunsárið hefði leitt af sér að hún lægi nú á spítala í Wrexham. Hún væri á leið í aðgerð til að láta fjarlægja bleikan dildó úr endaþarmi sínum, á meðan hann væri enn í gangi. „Laugardagur er svo sem ekki verri tími en hver annar,“ skrifaði hún kímin.
Aðgerðin gekk að óskum því ekki kom til þess að hún þurfti stóma. Miller, sem er kennaranemi, miðlar nú af reynslu sinni í þessum efnum. Hún hvetur fólk til að skammast sín ekki fyrir það sem hendir það í kynlífinu og víli ekki fyrir sér að leita sér hjálpar, fari illa.
Hún segir að umræða um þessi mál sé mikið tabú. Því vill hún breyta. Hún vill ekki að einhver veikist heiftarlega vegna þess að hann kunni ekki við að leita sér hjálpar. „Það fyndist mér afleitt.“
Læknarnir sögðu henni að reyna þetta ekki í bráð. „Ég tók nokkrar verkjatöflur og var sagt að gera þetta ekki aftur fyrr en ég væri tilbúin. Ég hef lært að maður þarf að fara varlega.“