Piltarnir í Mið-Íslandi eru mættir aftur í Þjóðleikhúskjallarann með nýja uppistandssýningu. Ari Eldjárn, Bergur Ebbi, Björn Bragi, Dóri DNA og Jóhann Alfreð mynda Mið-Ísland. Ein regla er höfð í hávegum. Efnið verður að vera nýtt. Það þýðir að flestir aðdáendur piltanna mæta á hverju ári.

„Það er okkar von, að þetta verði alltaf skemmtilegra og skemmtilegra og okkur hefur fundist það hingað til. Menn eru á tánum og það er alltaf markmiðið að verða betri en í fyrra, það segir sig sjálft.“

Þetta var haft eftir Jóhanni Alfreð Kristinssyni, einum meðlima grínhópsins í Mið-Íslandi fyrr á árinu í samtali við Vísi. Mið-Ísland hefur fyrir löngu slegið í gegn hjá þjóðinni og er nú með sitt fjórða sýningarár í Þjóðleikhússkjallaranum og sýningarnar orðnar um 200 og ekkert lát á vinsældum grínistanna. Mið Ísland tróð fyrst upp þann 7. maí 2009 á skemmtistaðnum Karamba.

Að þessu sinni var Bergur Ebbi fjarverandi og Anna Svava Knútsdóttir gestur hópsins. Jóhann Alfreð steig fyrstur á svið en hann var jafnframt kynnir og voru gestir byrjaðir að skella upp úr áður en Jóhann byrjaði að reita af sér brandarana. Þegar hann kynnti Önnu Svövu til leiks var stemmningin í salnum frábær og gerði Anna Svava óspart grín að nýfæddu barni sínu og móðurhlutverkinu. Jóhann reitti svo af sér nokkra brandara áður en Dóri DNA mætti á svið og skaut meðal annars nokkrum skotum á DV, en hann hafði verið nýlega til umfjöllunar á dv.is vegna myndskeiða sem hann birti á Snapchat.

Á hverju uppistandi má sjá nokkra fýlupúka sem mæta tilneyddir á skemmtun sem þessa, þá annað hvort sem fylgdarmenn maka, kærasta eða barna, krossleggja hendur, keyra hökuna niður í bringu tilbúnir að bíða þessi ósköp af sér, en í Þjóðleikhúskjallaranum þetta kvöld skellti hver einasti fýlupúki upp úr. Eftir hlé mættu þeir Björn Bragi og Ari Eldjárn á sviðið. Björn Bragi hefur vaxið gríðarlega og hefur á örskömmum tíma náð að verða fullmótaður uppistandari. Þegar svo Ari Eldjárn, stjarnan í hópnum, steig á svið ætlaði allt um koll að keyra.

Vinsældir Mið-Íslands hafa vaxið jafnt og þétt og áhorfendur búast við að fá mikið fyrir aurinn. Sú var tíð að ekki var gerð mikil krafa til íslenskt uppistands en það hefur breyst með tilkomu Mið-Íslands sem hefur fært þetta form á nýtt plan. Grín Mið-Íslands er beint upp úr íslenskum samtíma, stundum langar óborganlegar sögur, stundum beinskeytt kaldhæðin skot og inn á milli fimmaurabrandarar sem hitta beint í mark. Undirrituð getur lofað tveggja klukkutíma skemmtun, þar sem gestir munu hlæja sig máttlausa, enda ekki tilviljun að sýningarnar séu orðnar 200 talsins

Það er ekki of fast kveðið að orði að segja að uppistand þeirra félaga í Mið-Íslandi sé á heimsmælikvarða. Drífið ykkur, komið snemma, náið góðum sætum. Og ekki hafa áhyggjur, þú getur tekið fúla frænda þinn með. Hann mun hlæja líka. Hér er um fimm stjörnu skemmtun að ræða.