Tvítug stúlka lést eftir að hafa neitað að fylgja fyrirmælum lækna. Natasha Home, frá Middlesbrough á Englandi, var greind með sykursýki af tegund 1 í fyrra. Læknar sögðu henni að hún þyrfti að sprauta sig daglega með insúlíni og geta þá lifað eðlilegu lífi. Home taldi það óþarfi og féll að lokum í dá, hún lést svo um helgina. Foreldrar hennar vilja nú að dauði hennar verði öðrum víti til varnaðar.

Foreldrar Natöshu segja í samtali við breska dagblaðið Metro í dag að hún hafi verið mjög gjafmild, hún hafi hætt í háskóla og farið að vinna. Síðasta haust var hún farin að grennast og fann stöðugt fyrir miklum þorsta, móðir hennar, sem er lyfjafræðingur, ákvað þá að senda Natöshu til læknis þar sem hún var greind með sykursýki.

Hún neitaði að sprauta sig með insúlíni og vildi ekki nota aðrar aðferðir, taldi hún það óþarfi. Eftir að hafa ítrekað lent í rifrildi við foreldra sína vegna þess að hún neitaði að sprauta sig með insúlíni, flutti hún því til kærasta síns. Hvorki hann né vinir hennar vissu að hún væri með sykursýki. Að kvöldi 22. ágúst féll hún svo í dá og var flutt á sjúkrahús.

Jackie, móðir Natöshu, segir í samtali við Metro að hún voni að þetta verði öðrum víti til varnaðar. „Það þarf að hjálpa ungu kynslóðinni að skilja að þetta er ekki neitt til að skammast sín fyrir og átta sig á hversu alvarlegt þetta er.“