Aðeins rúmu hálfi ári eftir að stjórn Íslandspósts ákvað að greiða starfsmönnum launauppbót í ljósi góðrar afkomu fékk fyrirtækið hálfan milljarð króna í neyðarlán frá ríkissjóði til að forðast gjaldþrot.

Þetta kemur fram í Fréttablaðinu í dag.

Ekki nóg með að óbreyttir starfsmenn hafi fengið launauppbót heldur lagði stjórnin það einnig til um svipað leyti að hækka launin sín. Íslandspóstur hafði hagnast um 216 milljónir króna árið 2017 og 120 milljónir árið 2016. Síðustu þrjú ár þar á undan höfðu verið erfið og var mikið tap á rekstrinum.

Í janúar í fyrra samþykkti stjórnin að greiða starfsmönnum á föstum launum 20 þúsund krónur. Hlutastarfsfólk fékk einnig uppbót í samhengi við starfshlutfall. Tæpum mánuði síðar var lögð fram tillaga í stjórn um hækkun stjórnarlauna; almennir stjórnarmenn færu úr 140 þúsund krónum á mánuði í 165 þúsund krónur og formaður stjórnar úr 280 þúsund krónum í 330 þúsund krónur. Ekki virðist liggja fyrir, miðað við frétt Fréttablaðsins, hvort tillagan hafi verið samþykkt en hafi það verið gert er bent á að laun stjórnarmanna Íslandspósts hafa hækkað um 65 prósent frá árinu 2014. Laun forstjóra hafa hækkað um tæp 43 prósent frá 2014 til 2017.

Eins og fram kemur á forsíðu Fréttablaðsins í dag fékk Íslandspóstur 500 milljóna króna lán frá ríkinu í september síðastliðnum til að bregðast við lausafjárskorti. Þá var samþykkt heimild til að veita fyrirtækinu allt að milljarð króna í viðbótarlán.