„Einelti er ekki bara vandamál í skólum. Sögurnar úr heimi íþrótta eru ef eitthvað er verri,“ segir Björn Leví Gunnarsson, þingmaður Pírata.

Björn Leví hefur vakið mikla athygli undanfarna daga fyrir að ræða á opinskáan hátt um einelti. Björn hélt ræðu á Alþingi í vikunni þar sem hann vakti athygli á frásögn Hákonar Helga en sonur hans var laminn í skólanum fyrir skemmstu fyrir það eitt að vera rauðhærður. Sonur Hákonar er þrettán ára og spörkuðu tveir skólabræður hans í hann á meðan aðrir nemendur fylgdust aðgerðarlausir með eða hvöttu drengina áfram.

Björn Leví tjáði sig svo á opinskáan hátt í viðtali við Vísi um einelti sem hann varð fyrir á sínum grunnskólaárum. „Þetta voru uppnefningar, slagsmál, útilokun. Mest uppnefningar og svo fyrirlitningin sem fylgir þeim. Það var talað við mann eins og maður sé einskis virði,“ sagði Björn meðal annars.
Björn fékk mikil viðbrögð í kjölfarið, honum var hrósað og margir stigu fram sem höfðu svipaða sögu að segja.

Í færslu sem Björn skrifar í morgun á Facebook segir hann að einelti sé ekki bara bundið við skólana – þvert á móti. Sögurnar úr íþróttaheiminum séu jafnvel verri.

„Þaðan koma lýsingar um „menningu“ ýmissa liða, til dæmis hvernig þau taka á móti nýliðum, sem er ekkert annað en ofbeldi. Ein af ástæðunum fyrir því að ég hætti í handboltanum var að þar fann ég aftur fyrir eineltismenningunni sem ég hafði losnað við þegar ég byrjaði í framhaldsskóla.“

Björn nefnir svo dæmi um þetta:

„Það var svo merkilegt að í miðjum keppnisleik fundu samherjar tækifæri til þess að gera eitthvað til þess að sýna vald sitt, þó það væri augljóslega gegn hagsmunum liðsins. Sending í hina áttina, sending sem var ekki sending heldur grýting,“ segir Björn sem endar færsluna á þessum orðum:

„Það rifjast margt upp vegna fjölda ábendinga sem ég er að fá þessa dagana. Sögur af fótbrotum vegna tæklinga, uppnefnum í leik og á æfingum.“