Áformað er að opna bílakjallara undir Hafnartorgi um áramótin. Þar verður hægt að kaupa sólarhringspassa í stæði og mun hann líklega kosta um 25 þúsund á mánuði. Ef bíleigendur vilja leigja sérmerkt stæði þurfa þeir hins vegar að reiða fram 60-70 þúsund á mánuði.

Þetta kemur fram í Morgunblaðinu í dag. Þar er haft eftir Erni Tryggva Johnsen, rekstrarstjóra hjá ÞG Verki, að öll þjónusta fylgi með stæðunum en ekki sé gert ráð fyrir rafbílum.

Einnig verða dagpassar í boði en þeir munu væntanlega kosta 18-20 þúsund á mánuði. Kvöld- og næturstæði munu kosta 12-15 þúsund.

Í Hafnartorgi verða um 70 íbúðir og sjö þúsund fermetrar eru ætlaðir undir skrifstofur.