Lögreglunni á Suðurnesjum var í fyrradag gert viðvart um utanvegaakstur við Kleifarvatn. Í skeyti frá lögreglu kemur fram að þegar lögreglumenn mættu á svæðið hafi bifreið setið föst í sandinum við vatnið. Þá var búið að tæta og spóla upp á svæðinu í nágrenninu.
„Tveir menn voru við bifreiðina og vildu þeir í fyrstu ekkert kannast við að hafa valið skemmdunum, einungis fest bifreiðina. Í viðtölum við þá viðurkenndu þeir svo utanvegaaksturinn en héldu þó stíft við þá frásögn að fleiri hefðu verið á ferð á svæðinu og hefðu þeir einnig rótað upp sandinum. Málið fer í hefðbundið ferli,“ segir lögreglan.
