Lögreglan á Suðurnesjum hafði afskipti af bifreið á dögunum þar sem farþegi hélt á sex mánaða barni í fanginu. Barnið var þar af leiðandi ekki í tilskyldum öryggisbúnaði eins og lög gera ráð fyrir. Þetta kemur fram í skeyti frá lögreglu.
Þar segir einnig að átján ökumenn hafi verið kærðir fyrir of hraðan akstur í umdæmi lögreglunnar á Suðurnesjum á undanförnum dögum. Sá sem hraðast ók mældist á 153 kílómetra hraða þar sem hámarkshraði er 90 kílómetrar á klukkustund. Næstmesti hraði sem mældur var reyndist vera 147 kílómetrar þar sem hámarkshraði er einnig 90 kílómetrar. Í báðum tilvikum var um að ræða erlenda ferðamenn.
Fáeinir ökumenn voru teknir úr umferð vegna gruns um ölvunar- eða fíkniefnaakstur og skráningarnúmer voru fjarlægð af nokkrum bifreiðum sem voru ótryggðar eða óskoðaðar.
