Japanski bílaframleiðandinn Toyota hefur ákveðið að innkalla yfir milljón bifreiðar vegna mögulegrar eldhættu sem getur skapast í vél bifreiðanna. Yfir helmingurinn af bifreiðunum eru staðsettar í Japan, en einnig er um að ræða bifreiðar í Norður-Ameríku, Evrópu, Ástralíu og fleiri löndum. Bifreiðarnar sem munu vera innkallaðar voru framleiddar frá júlí 2015 til maí 2018.

Japanska samgöngumálaráðuneytið sendi frá sér tilkynningu um málið og kemur þar fram að eitt atvik hafi átt sér stað í Japan þar sem mikill reykur hafi komið úr vél bifreiðar. Samkvæmt yfirvöldum í Japan virðist gallinn vera sá að hlífar sem eiga að verja rafmagnsvíra eiga það til að gefa sig og getur það þá í framhaldi valdið skammhlaupi og mögulega eldur kviknað í bifreiðinni.

DV hafði samband við Páll Þorsteinsson, upplýsingafulltrúa Toyota á Íslandi vegna málsins. Páll segir að Toyota á Íslandi muni þurfa innkalla 329 bifreiðar. Eru þetta 38 Toyota Prius bifreiðar, 15 Toyota Prius plug-in bifreiðar og 276 Toyota C-HR bifreiðar. Eru eigendur beðnir um að hafa samband við Toyota á Íslandi til þess að fara yfir bifreiðina og gera við gallann. Varahlutirnir sem eiga að vera notaðir eru ekki en þá komnir til landsins, en að sögn Páls er stutt sé í þá. Hann bætir því einnig við að viðgerðin á ekki að taka langan tíma. Toyota á Íslandi mun svo hafa samband við alla eigendur þessara bifreiða hér á landi. Að sögn Páls mun Neytendastofu vera tilkynnt um málið í dag.