Maður vopnaður hnífi stakk mann til bana og særði tvo í Trappes, niðurníddu úthverfi í París, í morgun. Hrópaði hann vígorðið Allahu-Akbar (guð er mikill) sem alþekkt er að íslamskir hryðjuverkamenn taki sér í munn er þeir fremja ódæðisverk.
Lögregla skaut árásarmanninn til bana. Hryðjuverkasamtökin ISIS hafa lýst yfir ábyrgð á verknaðinum en árásin átti sér stað aðeins nokkrum klukkustundum eftir að leiðtogi samtakanna, Abu Bakr al-Baghdadi sendi frá sér yfirlýsingu þar sem hann hvatti vígamenn ISIS til hryðjuverka í Evrópu.
Greint er frá málinu meðal annars á vef BBC.
UPPFÆRT
Maðurinn sem um ræðir myrti móður sína og systur. Morðin eru því tvö. Hann særði aðra manneskju með hníf. Maðurinn hafði verið á gátlista frönsku hryðjuverkalögreglunnar frá árinu 2016 vegna tjáningar öfgafullra skoðana.
