„Persónulega hef ég aldrei skilið af hverju við Íslendingar horfum ekki meira til Færeyja sem er frábær eyja og geggjað skemmtilegt fólk með hrikalega góðan bjór, hvort sem hann er á vellinum eða ekki,“ er meðal þess sem stendur í Bakþönkum Fréttablaðsins í morgun. Bjarni Karlsson prestur lýsir þar fyrirmyndarstemningu á knattspyrnuleikjum í Færeyjum. Ekki síst er hann ánægður með að seldur er bjór á leikjunum en á Laugardalsvellinum sé bara bjór fyrir VIP-gesti. Pistillinn er skrifaður í tilefni af því að framundan er bikarúrslitaleikurinn í Færeyjum en þar þjálfar Íslendingurinn Heimir Guðjónsson annað liðið sem þar keppir, HB.

Séra Bjarni fer einnig ófögrum orðum um umgjörðina í bikarkeppninni á Íslandi og segir að Íslendingar standi Færeyingum langt að baki hvað varðar umgjörð um bikarúrslitaleiki.

Í lokin skrifar Bjarni:

„Ég held að KSÍ ætti að skella sér á laugardaginn og sjá Heimi Guðjónsson og félaga í HB og læra hvernig eigi að halda bikarúrslitaleik. Því það verða nánast pottþétt fleiri á þeim leik en á bikarúrslitaleiknum hér heima.“

Það sérkennilega við þessi skrif er að séra Bjarni Karlsson hefur aldrei áður skrifað um knattspyrnu í pistlum sínum en hann fjallar gjarnan um jafnréttismál og alvarleg þjóðfélagsvandamál. Þá er mjög úr karakter að sjá prestinn mæla með bjórdrykkju á knattspyrnuleikjum.

Í ljós hefur komið að um mistök var að ræða og var birtur rangur höfundur við greinina. Réttur höfundur er íþróttafréttamaðurinn Benedikt Bóas Hinriksson. Pistilinn má lesa hér.

Bjarni Karlsson hefur húmor fyrir þessum mistökum því hann skrifar á Facebook-síðu sína:

„Jæja, það er búið að grenja af hlátri hér í morgunsárið. Aftan á Fréttablaðinu eru bakþankar eignaðir mér þar sem ég hrósa Færeyskum bjór og tala um hve „geggjað gaman“ það er að fara á knattspyrnuleiki í Þórshöfn!“