Helgi Gunnlaugsson, prófessor í félagsfræði við Háskóla Íslands, segir að það hafi komið honum á óvart hversu margir stunda það sem kallað er ólöglegt niðurhal.

Þetta segir Helgi í Fréttablaðinu í dag þar sem hann ræðir meðal annars um áhættusækna hegðun einstaklinga á netinu og auknar líkur á að þessir sömu einstaklingar verði fyrir netbrotum.

Eins og fram kemur í Fréttablaðinu er áhættusækin hegðun á netinu skilgreind  til dæmis með ólöglegu niðurhali og heimsóknum á óæskilegar netsíður, til dæmis klámsíður.

Helgi skrifaði nýlega bókina Afbrot og íslenskt samfélag en einn kafli í bókinni er tileinkaður netglæpum á Íslandi. Í mælingu sem Helgi vitnar til reyndist fylgni milli áhættusækinnar hegðunar á netinu og þess að verða fyrir barðinu á netglæpum. Tveir af hverjum þremur í aldurshópnum 18 til 29 ára viðurkenna að hafa stundað ólöglegt niðurhal og segir Helgi að þær tölur komi honum á óvart.

„Það þykir nánast sjálfsagt að stunda slíka iðju,“ segir hann og bætir við að netglæpir færist í aukana samhliða aukinni tækni.  „Tæknin er að gera okkur mögulegt að fremja hefðbundin brot yfir netið, til dæmis auðgunarbrot. Svo er það dreifing á viðkvæmum myndum sem er til dæmis notuð til að kúga fólk,“ segir Helgi sem bendir svo að snjallsímaeign barna sé orðin mikil og útbreidd. Vandræði geta fylgt henni eins og dæmin sanna, netníð þar á meðal.

Helgi segir að lokum við Fréttablaðið að þetta séu atriði sem taka þurfi fastari tökum.