Tekjur á fyrsta ársfjórðungi 2016 námu um 4 milljörðum króna sem er 141% aukning miðað sama tímabil í fyrra sem var 1,7 milljarðar króna. Rekstarhagnaður án afskrifta á fyrsta ársfjórðungi voru 680 milljónir króna og jókst um milljarð milli ára. Hagnaður félagsins eftir skatta á fyrsta ársfjórðungi var 400 milljónir króna samanborið að hann var neikvæður um 280 milljónir á fyrsta ársfjórðungi árið 2015. Þetta kemur fram í tilkynningu frá Wow air.

Á fyrsta ársfjórðungi hefur WOW air flogið með 193 þúsund farþega sem er aukning um 119% á milli ára. Sætanýtingin á fyrsta ársfjórðungi er 88% og fjölgaði framboðnum sætiskílómetrum um 164% milli ára sem er mesta aukning frá stofnun félagsins.

Skúli Mogensen forstjóri flugfélagsins kveðst ánægður með árangurinn.

„Við höfum vaxið hratt og það er ánægjulegt að sjá hversu vel okkur hefur tekist að ná frábærri nýtingu yfir vetrarmánuðina þrátt fyrir meira en tvöföldun á framboði. Persónulega er ég fyrst og fremst þakklátur fyrir hversu góðar móttökur við höfum fengið á Norður-Ameríkuflugi okkar sem og hversu vel WOW teymið hefur haldið utan um þennan mikla vöxt.“