Í Kastljósþætti kvöldsins var fjallað um „Gervimann útlönd“ sem var í hópi stærstu skuldara bankanna við hrun þeirra árið 2008. Nafnið vísar ekki til tiltekins einstaklings heldur er um að ræða samheiti yfir fjölmarga óþekkta erlenda lögaðila.
Í Kastljósþættinum kom fram að samkvæmt gögnum úr Rannsóknarskýrslu Alþingis námu skuldir hans um hundrað milljörðum króna og átti hann stóran hlut í íslenskum fyrirtækjum. Þá er nafnið eða hugtakið vísun til félaga erlendis sem eru með óljóst eignarhald.
„Gervimaður útlönd er samheiti fyrir 14 kennitölur yfir óþekkta aðila erlendis,“ segir í skýrslunni og því bætt við að „gervimaður útlönd“ hafi fyrst kom fram á sjónarsviðið árið 2006. „Hann stígur fram á sjónarsviðið 2006 og er þá orðinn skráður eigandi íslenskra fyrirtækja.“
Í umfjöllun Kastljós segir að gervimaðurinn hafi skuldað um 100 milljarða við fall bankanna. Arðgreiðslur sem hann þáði voru háar og átti hann meira en tíu prósent hlut í 400 íslenskum fyrirtækjum á árunum 2006 til 2008.
Árið 2006 þáði gervimaðurinn rúmar tólf hundruð milljónir í arð. Tvo milljarða árið 2007 og rúma 2,2 milljarða árið 2008. Var gervimaðurinn í 2 sæti yfir stærstu arðþiggjendur ársins.
Í lok árs skuldaði gervimaðurinn íslensku bönkunum tæpa 45 milljarða og við hrun var skuldin um 100 milljarðar.
Í umfjöllun Kastljós sem sjá má hér segir að með tilkomu Panamaskjallanna sé hinn óþekkti gerandi, Gervimaður útlönd, smám saman að birtast í kunnuglegum andlitum Íslendinga.
