„Ég eld við séum ekki að skjóta okkur í fótinn,“ sagði Smári McCarthy, oddviti Pírata í Suðurkjördæmi, í viðtali á Morgunvaktinni á Rás 1 í morgun. Hann var þá spurður hvort það gæti komið flokknum illa að leggja drög að rauðri blokk en Píratar hafa boðið Samfylkingunni, Bjartri framtíð, VG og VIðreisn til stjórnarmyndunarviðræðna. Markmiðið er að leggja drög að sáttmála fram tveimur dögum fyrir kosningar.

Það er óhefðbundin nálgun í íslenskum stjórnmálum en vanalega er ríkisstjórnarsáttmáli lagður fram að loknum kosningum og viðræðum.

„Ég veit ekki hvort þessi blokk sé rauð eða græn eða fjólublá eða hvað, en ég held að við séum ekki að skjóta okkur í fótinn. Ef við værum með það eina markmið að ná völdum þá værum við sennilega að því. En okkar eina markmið er að ná breytingum,“ sagði Smári.

Fulltrúar Vinstri grænna og Samfylkingar hafa tekið vel í viðræðurnar en Björt framtíð og Viðreisn síður. Björt Ólafsdóttir, þingmaður Bjartrar framtíðar, sagði í gær að hún liti á það sem ákveðin klækjastjórnmál að stilla fólki upp við vegg fyrirfram.

Smári sagði í útvarpinu í morgun að það væru í raun klækjastjórnmál að stilla kjósendum upp við þann vegg að vita ekkert að hverju þeir væru að ganga, þegar þeir kysu. „Það er ekki heldur eins og við séum ekki búin að tala um þetta, við höfum verið að tala þessu máli í eitt og hálft ár.“

Hann sagði jákvætt að flokkarnir tveir, Viðreisn og Björt framtíð, tækju hugmyndunum af varfærni.