Manchester United er ekki í frábærri stöðu í Meistaradeild Evrópu eftir leik gegn Paris Saint-Germain í vikunni. Liðin áttust við í 16-liða úrslitum Meistaradeildarinnar en fyrri leikurinn fór fram á Old Trafford.
Það voru gestirnir í PSG sem höfðu betur að lokum með tveimur mörkum gegn engu. Fyrra mark leiksins gerði Presnel Kimpembe eftir hornspyrnu og það síðara gerði Kylian Mbappe eftir laglega skyndisókn.
United þarf því að eiga ansi góðan leik í París ef liðið ætlar að komast í næstu umferð keppninnar.
Til að bæta gráu ofan á svart fékk skærasta stjarna liðsins, Paul Pogba rautt spjald seint í leiknum og missir af þeim síðari.
Enskir miðlar segja að í fyrsta sinn í stjóratíð sinni á Old Trafford, hafi Solskjær lesið yfir leikmönnum sínum. Hárblásari í anda Sir Alex Ferguson.
Pogba var mikið niðri fyrir og bað samherja sína afsökunar á að hafa látið reka sig af velli.