Amazon birti í gær afar áhugaverða heimildarmynd þar sem farið er á bakvið tjöldin hjá Englandsmeisturum Manchester City.
‘Manchester City: Allt eða ekkert’ er heimildarmyndin sem gefin var út en alls er hægt að horfa á átta þætti.
Pep Guardiola, stjóri City, kemur mikið fram í þessari mynd en hann er af mörgum talinn besti knattspyrnustjóri heims.
Það er athyglisvert að skoða atvik sem kom upp í úrslitum deildarbikarsins á síðustu leiktíð þar sem City mætti liði Arsenal undir stjórn Arsene Wenger.
Guardiola var alls ekki ánægður með hegðun Wenger á hliðarlínunni en hann kvartaði mikið undan dómurunum í úrslitaleiknum.
,,Það er alltaf dómurunum að kenna, alltaf! Haltu kjafti þarna!“ öskraði Guardiola á Wenger í leiknum.
City endaði á að vinna leikinn örugglega með þremur mörkum gegn engu og vann í kjölfarið tvennuna.