Kasper Schmeichel, markvörður Leicester City, hefur opnað sig varðandi atvik sem kom upp í október.

Vichai Srivaddhanaprabha, eigandi Leicester, lét þá lífið í þyrluslysi en þyrla hans hrapaði rétt fyrir utan heimavöll liðsins.

Fjórir aðrir farþegar létust einnig í slysinu en Schmeichel var enn á staðnum þegar þyrlan hrapaði til jarðar.

Hann man eftir öllu sem gerðist þetta skelfilega kvöld og fann strax á sér að eitthvað væri að þegar þyrlan fór á loft.

,,Því miður þá man ég eftir þessu öllu saman. Ég man eftir öllum smáatriðunum,“ sagði Schmeichel.

,,Ég var með fjölskyldugesti frá Danmörku í heimsókn og ég sýndi þeim völlinn aðeins og grasið – þyrlan var alltaf mjög vinsæl.“

,,Við veifuðum bless og horfðum á hann yfirgefa svæðið. Ég hafði séð þetta hundrað sinnum – þetta var orðin ákveðin hefð.“

,,Þú gast séð að það var eitthvað að því vanalega þá er þyrlan ekki föst á sama stað og það sem kom í ljós, kom í ljós.“

,,Ég hljóp strax á vettvang. Fólk sem stóð þarna megin við völlinn hafði ekki séð hvað átti sér stað.“

,,Ég öskraði á fólkið að hringja á lögregluna og öryggisverðir vallarins tóku eftir mér og eltu mig.“

,,Við komumst ansi nálægt og einn af öryggisvörðunum komst nær en ég og reyndi að komast inn og gera eitthvað.“

,,Það var þó strax augljóst að vegna hitans þá var ekkert sem nokkur maður gat gert. Það var hræðilegt að vera svo hjálparlaus.“