Robert Snodgrass, leikmaður West Ham, fékk skýr skilaboð frá Manuel Pellegrini, stjóra liðsins í sumar.

Snodgrass mætti til æfinga of þungur eftir komu Pellegrini en hann lék með Aston Villa á síðustu leiktíð í láni.

Snodgrass hefur nú útskýrt af hverju hann mætti í slæmu standi til baka en hann þurfti að ferðast mikið hjá Villa. Snodgrass er búsettur í London en Villa er staðsett í Birmingham.

,,Ég sagði við þjálfarann: ‘Þú mátt prófa að ferðast frá London til Birmingham, borða á ferðinni og á sama tíma halda jöfnu mataræði!’ sagði Snodgrass.

,,Ég var að ferðast næstum því 450 kílómetra á dag. Ég kom alls staðar við í landinu.“

,,Ég var í láni á síðustu leiktíð og það var erfitt að koma fyrir einhverri rútínu. Þetta var örugglega erfiðasta ár sem ég hef upplifað.“

,,Ég reyndi að vera fjölskyldumaður og knattspyrnumaður á sama tíma, það er mjög erfitt.“

,,Ég sagði við hann: ‘Ég mun gefa allt í sölurnar, gefðu mér bara tækifæri og ég mun grípa það – Ef ekki þá kenni ég sjálfum mér um.’

,,Planið var aldrei að koma hingað og taka bara þátt. Ég vildi vera partur af liðinu og vinna fyrir mínum launum.“