Hlaðvarpsþátturinn, 90 mínútur hefur hafið göngu sína en um er að ræða þátt sem Hörður Snævar Jónsson, ritstjóri 433.is stýrir.

Rætt verður um fótbolta við áhugaverða gesti í vetur, farið verður um víðan völl.

Næsti gestur þáttarins er Þorvaldur Örlygsson þjálfari U19 ára landsliðs karla.

Þorvaldur hefur átt áhugaverðan feril, fyrst sem leikmaður og þjálfari.

Þorvaldur ræddi aðeins um fyrrum leikmann Manchester United, Roy Keane en þeir léku saman hjá Nottingham Forest.

Keane er af mörgum talinn einn öflugasti miðjumaður í sögu ensku úrvalsdeildarinnar en hann var frábær leiðtogi á sínum tíma.

Þorvaldur kom til Forest ári á undan Keane sem var fenginn frá írska félaginu Cobh Ramblers árið 1990.

Hann talar nokkuð vel um Keane sem var aðeins þrjú ár hjá Forest og samdi svo við United þar sem hann spilaði í 12 ár.

,,Hann kemur ári á eftir mér og dettur inn í liðið gegn Liverpool úti. Það voru veikindi og hann var nýkominn,“ sagði Þorvaldur.

,,Brian Clough átti það til og var mjög duglegur við það að henda mönnum í djúpu laugina án þess að gefa þeim tíma til að hugsa eins og ég lenti sjálfur í.“

,,Við spilum við Liverpool, menn veikjast kvöldið áður og hann dettur beint í liðið og horfði ekkert til baka eftir það.“

,,Þegar hann kemur til Forest þá er hann illa nærður og horaður Íri. Hann rífur kjaft og enginn skildi hann!“

,,Hann vinnur sig inn og vinnur sér inn virðingu innan hópsins. Hann var skynsamur stjórnandi og var fljótlega góður leikmaður fyrir Forest. Hann þroskaðist vel undir Brian Clough og þeim leikmönnum sem voru í kringum hann.“