Dominic Thompson, ungur leikmaður Arsenal, er heppinn að vera á lífi eftir bílslys sem átti sér stað í gær.

Thompson er aðeins 18 ára gamall og þykir efnilegur en hann var á leið á æfingasvæði félagsins er slysið átti sér stað.

Mercedes bifreið Thompson klessti á Citroen bifreið á miklum hraða og var síðarnefndi bíllinn í mun verra ástandi eftir áreksturinn.

Stuttu eftir fyrri áreksturinn kom annar bíll á miklum hraða en ung kona var við stýrið og náði ekki að hemla nógu fljótt til að koma í veg fyrir frekari árekstur.

Hún ræddi við fjölmiðla eftir slysið og kennir þessum unga bakverði um það sem átti sér stað.

,,Ég fór úr bílnum og hann var þarna klæddur í Arsenal fötin með Arsenal bakpoka. Bíllinn sem hann klessti á fyrst var mjög skemmdur og bílstjórinn var fastur og komst ekki út,“ sagði konan.

,,Það var hringt á lögregluna og ég reyndi að opna dyrnar á bílnum. Hann stóð bara þarna og horfði á símann sinn.“

,,Hann sagðist hafa verið að reyna að forðast það að keyra yfir rautt plastbrot sem var á veginum en það var mjög augljóst að það var eitthvað að trufla hann við stýrið.“

Hvorki Thompson né Arsenal hafa viljað tjá sig um málið að svo stöddu.