Rúrik Gíslason, leikmaður íslenska landsliðsins, segir að það sé mikilvægt að fólk sé ekki of svartsýnt þrátt fyrir erfitt gengi undanfarið.

Ísland náði í frábær úrslit gegn heimsmeisturum Frakklands á fimmtudag á útivelli en áður tapaði liðið 6-0 gegn Sviss og 3-0 gegn Belgum.

Rúrik segist sjálfur vera í góðu standi en hann hefur verið að glíma við smávægileg meiðsli í mjöðm.

,,Standið er bara gott. Ég var að ströggla aðeins með mjöðmina á mér en það hefur gengið betur en ég þorði að vonast eftir,“ sagði Rúrik.

,,Það hefur verið fullmikið af svartsýnisröddum sem kikkuðu inn eftir síðustu tvo leiki. Auðvitað voru það hræðileg úrslit en það höfðu miklar breytingar átt sér stað.“

,,Það komu inn nýir þjálfarar og svoleiðis og við erum að slípa þetta saman. Þetta tekur smá tíma en við erum á réttri leið.“

,,Maður vonast til að fólk gefi okkur smá svigrúm til að skerpa á nýjum áherslum, það tekur sinn tíma og það er mikilvægt að við stöndum saman, ekki bara þegar vel gengur.“

,,Þetta var mjög mikill skellur úti í Sviss. Við reyndum ákveðna hluti sem gengu ekki nógu vel upp, það yrði ákveðin fullnæging að ná að hefna fyrir þau úrslit.“

,,Manni leið verr og verr eftir að mörkin urðu fleiri en eins og ég segi þá erum við að vinna í ákveðnum nýjum áherslum, við gerðum það gegn Sviss og það er mikilvægt að sjá, annað hvort ganga þær upp eða ekki.“