Jose Mourinho, stjóri Manchester United, hefur unnið ófáa titla á ferlinum og upplifði til að mynda ótrúlegt ár með Inter Milan á sínum tíma.

Mourinho vann þrennuna með Inter árið 2010 en liðið vann ítalska bikarinn, Serie A og Meistaradeildina.

Tronchetti Provera, fyrrum stjórnarformaður Inter, hefur nú tjáð sig um atvik sem átti sér stað eftir leik við Siena í deildinni þann 5. maí.

Inter tryggði sér deildarmeistaratitilinn með sigri í þeim leik og átti aðeins einn leik eftir á tímabilinu, gegn Bayern Munchen í úrslitum Meistaradeildarinnar.

,,Beint eftir leikinn gegn Siena þá leitaði ég að Mourinho en fann hann hvergi,“ sagði Provera.

,,Hann hafði bara horfið. Að lokum þá fann ég hann liggjandi í liðsrútunni hágrátandi, alveg einan. Hann var alveg búinn á því.“

,,Við unnum undanúrslit Meistaradeildarinnar gegn Barcelona. Við fórum í úrslitaleikinn mjög rólegir og fullir sjálfstrausts því við höfðum nú þegar afrekað eitthvað magnað.“

,,Það var augnablikið þar sem við áttuðum okkur á því að við gætum unnið Meistaradeildina með fullan völl San Siro á bakvið okkur.“