KR vann mikilvægan sigur í Pepsi-deild karla í kvöld er liðið vann Grindavík með tveimur mörkum gegn engu.
KR skoraði mörk sín seint í leiknum en Óskar Örn Hauksson og Björgvin Stefánsson sáu um að tryggja KR stigin þrjú.
Hér má sjá það góða og slæma úr leiknum.
Plús:
Það er hægt að tala um veðrið, loksins er veðrið aðeins að taka við sér. Frábærar aðstæður í Vesturbænum í kvöld.
Grindvíkingar mega alveg fá hrós fyrir sína frammistöðu. Voru sterkir varnarlega lengi vel en þurftu á endanum að sætta sig við tap eftir tvö mörk undir lok leiksins.
Ég sagði það í síðasta leik KR í 1-0 sigri á Stjörnunni að liðið væri sterkara varnarlega án Albert Watson. Ég held að það sé alveg klárt mál, voru ekki eins veikir í að verjast skyndisóknum.
Óskar Örn Hauksson skoraði fyrir KR í dag beint úr aukaspyrnu. Hann tryggði liðinu einnig sigur úr aukaspyrnu gegn Stjörnunni í síðustu umferð, það er ansi vel gert!
Mínus:
Það vantaði alveg dauðafærin og jafnvel hálffærin í þennan leik. KR reyndi mikið en Grindvíkingar voru öflugir aftast nánast allan leikinn þar til undir lok leiksins er liðið missti hausinn.
KR komst ófáum sinnum í góða fyrirgjafastöðu en sendingarnar voru nánast alltaf lélegar. Með fram grasinu og beint á gulan leikmann. Þurfa að vinna í þessu.
Aukaspyrnumark Óskars. Boltinn fór í gegnum varnarvegg Grindvíkinga sem virtust hræddir við að fá boltann í sig. Hvað er það? Má ekki.
Það vantaði þá klárlega meira púður í sóknarleik Grindvíkinga. Buðu upp á mjög takmarkað fram á við og ógnuðu mjög lítið.
