„Þetta er óhugnanlega sterkt lið. Það eru engar venjulegar stjörnur í þessu liði. Þeir geta unnið hverja sem er á góðum degi. Þeirra möguleikar? Þeir eru alveg contenders í að vinna mótið,“ sagði varnarmaðurinn sterki, Kári Árnason, á blaðamannafundi í morgun.

Þar var Kári spurður út í króatíska liðið sem Ísland mætir í Rostov á þriðjudag. Ísland og Króatía hafa mæst oft á undanförnum árum og segir Kári að um sé að ræða frábært lið. Þjálfari Króata hefur gefið til kynna að hann muni hvíla leikmenn gegn Íslandi, sérstaklega í ljósi þess að Króatar eru komnir áfram í 16-liða úrslit og geta leyft sér það. Kári segir að leikmannahópur Króata sé það sterkur að það skipti engu máli.

„Það að þeir hvíli leikmenn hefur engin áhrif. Þeir eiga frábæra leikmenn á bekknum og eru gott lið. Ég held að það hafi ekki mikil áhrif á leik þeirra, nema kannski varðandi gæði einstakra leikmanna. Við þurfum að eiga góðan leik til að vinna þá,“ sagði hann.

Kári benti á að leikmenn íslenska liðsins væru fullir sjálfstrausts fyrir leikinn gegn Króata og hefðu fulla trú á að þeir gætu unnið þá.

„Við höfum gert það áður og vitum að við getum það. Þeir eru með gríðarlega breiðan hóp þannig að það skiptir litlu hver byrjar. Við höfum unnið þá áður og ætlum okkur að vinna þá aftur,“ sagði Kári en Ísland vann Króata á Laugardalsvelli í undankeppni HM síðasta haust, 1-0.