Eftir tapleik Íslands gegn Nígeríu í gær veltu ýmsir því fyrir sér hvort Heimir Hallgrímsson hefði frekar átt að stilla upp í sama leikkerfi og hann gerði gegn Argentínu. Þá var Alfreð Finnbogason einn frammi, Gylfi Þór Sigurðsson þar fyrir aftan og Emil Hallfreðsson og Aron Einar Gunnarsson á miðjunni.

Í leiknum í gær ákvað Heimir að stilla upp í leikkerfið 4-4-2 með þá Jón Daða Böðvarsson og Alfreð Finnbogason í fremstu víglínu og þá Gylfa Þór Sigurðsson og Aron Einar á miðjunni. Ísland tapaði 2-0 og söknuðu margir þess að sjá ekki Emil Hallfreðsson í liðinu, en hann átti góðan leik gegn Argentínu.

Þegar Heimir var spurður að því í morgun hvort hann vildi að hann hefði gert eitthvað öðruvísi, til dæmis hvað varðar uppstillingu sagði hann:

„Alltaf þegar þú tapar leik þá hugsar maður hvað maður hefði átt að gera öðruvísi. Hefðum við náð að skora fyrsta markið hefði þetta verið geggjuð taktísk breyting, þannig er bara fótboltinn. Þú gerir eitthvað og stundum gengur það upp og stundum ekki og þannig er það bæði í fótbolta og í lífinu. Þú verður að taka ákvarðanir. Þessi leikaðferð hefur hentað okkur mjög vel oft áður. Hún gekk ekki upp í gær og þannig er bara lífið.“

Heimir segir að honum hafi gengið ágætlega að sofna í gærkvöldi og sagðist hann hafa horft á leikinn gegn Nígeríu um það bil tvisvar sinnum eftir að flautað var til leiksloka í gær. Aðspurður hvernig leikurinn horfir við honum nú, tæpum sólarhringi eftir að honum lauk, sagði Heimir:

„Bara eins og alltaf, þegar maður horfir á leik aftur sem maður tapar þá er upplifunum betri þegar maður horfir á hann í annað sinn heldur en þegar maður upplifði hann á vellinum. Já, já. Þetta var leikur sem var smá kaflaskiptur. Fyrri hálfleikur var góður og við fórum með það leikplan að þeir myndu opna sig þegar leið á leikinn ef þeir næðu ekki að skora. En svo ná þeir þessu marki í upphafi síðari hálfsleiks og það breytir leikmyndinni. Við þurfum að koma framar á völlinn og þá erum við að spila leikinn upp í hendurnar á Nígeríumönnum, þeirra styrkleiki eru skyndisóknir og þannig gátu þeir spilað upp á sinn styrkleika sem var vont fyrir okkur,“ sagði Heimir og bætti við nígeríska liðið hefði höndlað aðstæðurnar í gær betur en íslenska liðið:

„Ef við leggjum saman þessi tvö lið þá eru þeir líklega fljótari en við að hlaupa og réðu betur við aðstæðurnar eins og þær voru í gær. Leikmyndin var þeim í hag og auðvitað var heitt sem er eitthvað sem eru vanari. Þetta spilaðist upp í hendurnar á þeim.“