Þeir eru vandfundir harðari stuðningsmenn íslenska landsliðsins en Mikael Nikulásson. Mikael er mættur til Rússlands til að fylgjast með íslenska landslinu á HM og hann ætlar að fylgja liðinu svo lengi sem það er enn í keppninni, líkt og hann gerði á Evrópumótinu árið 2016.

433.is hitti Mikael á Fan Zone í Volgograd áðan þar sem stuðningsmenn íslenska landsliðsins voru samankomnir fyrir leikinn. Mikael segist kunna vel við sig í Rússlandi.

„Þetta er bara eitthvert skemmtilegasta land sem ég hef komið til. Moskva var frábær, kíkti til Pétursborgar sem var geðveikt og það stendur allt undir væntingum hérna,“ sagði Mikael sem sagðist gera væntingar um sigur gegn Nígeríu í dag.

„Við eigum að vera með betra lið og sigur, sérstaklega tveggja marka sigur, ætti að tryggja okkur nokkurn veginn áfram,“ sagði Mikael sem bætti við aðspurður að stórsigur Króatíu gegn Argentínu í gærkvöldi hafi ekki komið honum sérstaklega á óvart. Sjálfur hafi hann spáð 2-0 fyrir Króatíu og því hafi 3-0 ekki komið mikið á óvart. „Króatía með frábært lið sem getur farið langt.“

Jóhann Berg Guðmundsson verður fjarri góðu gamni í íslenska liðinu og segir Mikael að fjarvera hans hafi áhrif. Mikil samstaða sé í liðinu og þó einn maður, þótt öflugur sé, verði ekki með getur liðið haldið áfram að spila sinn leik.

Mikael var beðinn um að spá fyrir um úrslit og kvaðst hann reikna með 2-0 sigri Íslands. Segir Mikael að Alfreð Finnbogason skori bæði mörkin.

Mikael fylgdi íslenska liðinu á alla leikina í Frakklandi fyrir tveimur árum og hann ætlar að halda uppteknum hætti í Rússlandi. „Ég tek alla leikina meðan við erum hérna. Maður verður að styðja liðið.“