Gríðarleg stemming er í Volgograd enda styttist óðum í leik Íslands og Nígeríu, líklega einn mikilvægasta leik sem íslenska liðið hefur spilað (reyndar er búið að segja þetta um flesta leiki sem Ísland hefur spilað síðustu 4 ár og því algjörlega óþarfi að breyta útaf hefðinni).
Blaðamaður 433.is rölti um borgina og rakst þar á Móeiði Lárusdóttur og Alexöndru Ívarsdóttur sem voru í hátíðarskapi. Móeiður er kærasta Harðar Björgvins Magnússonar sem nýlega skrifaði undir samning við stórliðið CSKA Moskvu. Framundan eru því búferlaflutningar til rússnesku höfuðborgarinnar og Móeiður sagðist hafa verið efins í fyrstu. „Mér líst mun betur á að flytja til Rússlands núna eftir að hafa heimsótt staðinn. Moskva kom mér á óvart og ég held að ég sé bara orðin spennt ,“ sagði Móeiður kát. Aðspurð hvort að eitthvað eitt hafi heillað hana við borgina sagði hún: „Það var örugglega Rooftop-barinn sem við fórum á,“ sagði Móeiður og hló.
Alexandra, sem er kærasta Gylfa Sigurðssonar, tók undir orð Móeiðar um Moskvu: „Hún kom mjög á óvart, virkilega falleg borg,“ sagði Alexandra.
Spurðar um tilfinningar sínar fyrir leiknum þá voru þær báðar sammála um að sigur blasti við. „Ég hef mjög góða tilfinningu fyrir leiknum. Andinn í hópnum er góður Ég held að við vinnum 2-0 og já, ég held að Gylfi skori,“ sagði Alexandra. Móeiður tók undir þetta: „Við erum sigurstranglegra liðið, ég held að þetta fari 2-0.“