Cesc Fabregas, leikmaður Chelsea og margreyndur landsliðsmaður Spánar, hrósar Íslandi fyrir spilamennskuna gegn Argentínu um liðna helgi.

Þessi 31 árs gamli miðjumaður á 110 landsleiki að baki fyrir Spán en hann var þó ekki valinn í lokahópinn fyrir mótið í Rússlandi.

Í pistli sem hann skrifar fyrir BBC segir Fabregas að það hafi verið aðdáunarvert að fylgjast með því hvernig íslenska liðinu tókst að stöðva Lionel Messi. Enginn einn leikmaður hafi haft það hlutverk að gæta hans sérstaklega en með marga menn fyrir aftan boltann hafi hann ekki fengið neitt pláss til að athafna sig.

„Að sjá Messi stöðvaðan gerist ekki oft, svo það verður að hrósa Íslandi fyrir það hvað þeir gerðu það vel. Ég sá að Messi færði sig aftar á völlinn eftir því sem leið á leikinn og reyndi að láta hlutina gerast þar,“ segir Fabregas og bendir á að afleiðing þess hafi verið að Messi var ekki lengur með boltann þar sem hann er hættulegastur, upp við mark íslenska liðsins.

„Þú vilt hafa hann hátt á vellinum svo hann geti fengið boltann á síðasta þriðjungi vallarins. Þar getur hann látið hlutina gerast. Ef honum finnst hann ekki fá nógu mikla þjónustu þá færir hann sig dýpra og dýpra og það er ekki góðs viti fyrir argentínska liðið.“

Fabregas bendir á að svipað hafi verið uppi á teningnum hjá Messi og argentínska liðinu í 3-0 tapinu gegn Króatíu í gærkvöldinu og í 1-1 jafnteflinu gegn Íslandi. Argentínska liðið virki brotið og það sé ekki Lionel Messi að kenna að svo sé. Staðreyndin sé sú að hann vanti betri leikmenn í kringum sig.