Hörður Snævar Jónsson skrifar frá Rússlandi:

Hannes Þór Halldórsson og Alfreð Finnbogason sátu fyrir svörum í Rússlandi í dag á fréttamannafundi.

Hannes og Alfreð voru bestu menn Íslands í jafnteflinu gegn Argentínu í fyrsta leik á HM.

Þeir voru í dag spurðir um þau áhrif sem Lars Lagerback hafði á íslenskan fótbolta.

,,Lagerback gaf okkur rosalega mikið, kom á góðum tíma. Íslenskur fótbolti þurfti á honum að halda, manni með reynslur frá landsiðum. Við tókum mikið frá honum, hann gerði frábæra hluti. Við höfum tekið næsta skref eftir að hann fór, áhrif Lagerback eru þó enn til staðar,“ sagði Hannes um málið.

Alfreð tók í sama streng en sagði að Heimir Hallgrímsson og Helgi Kolviðsson hefðu tekið liðið á næsta stig.

,,Hann setti upp leikstíl sem við notum enn í dag, gerði margt frábært fyrir íslenskan fótbolta. Einbeiting núna er á þetta starfslið sem kom okkur á HM, þjálfararnir hafa tekið næsta skref. Við höfum fleiri útfærslur af leikkerfum, fleiri leikmenn sem geta tekið þátt og hafa meiri reynslu. Við eigum ekki að gleyma því hvað hann gerði en einbeitingin núna á HM, á að vera á liðið sem er hér núna.“