Óhætt er að segja að Rúrik Gíslason sé að gera góða hluti innan vallar sem utan. Rúrik hefur átt góða leiki með íslenska landsliðinu að undanförnu svo eftir hefur verið tekið.

Ef marka má fylgjendur Rúriks á samfélagsmiðlinum Instagram er þessi öflugi knattspyrnumaður býsna vinsæll meðal kvenna. Áður en leikur Íslands og Argentínu hófst í gær var Rúrik með rúmlega 30 þúsund fylgjendur á Instagram.

Þegar þetta er skrifað, innan við sólarhring eftir að leik lauk, eru fylgjendur hans orðnir 254 þúsund!

Fylgjendafjöldi hans hefur því rúmlega sexfaldast eftir leikinn gegn Argentínu. Ef marka má athugasemdir við nýjustu myndir Rúriks má ætla að flestir þessara nýju fylgjenda séu frá löndum Suður-Ameríku. Og þemað í færslunum við myndirnar sem Rúrik birtir er að hann sé þó nokkuð myndarlegri en meðalmaðurinn.

Einn notandi „taggar“ nokkrar vinkonur sína í færslu og segir: „Stelpur, ég fann hann – það er ekki hægt að vera sætari“. Færslunni fylgir svo emoji-andlit þar sem tvö hjörtu eru í stað augna. Annar notandi segir svo við þessa sömu mynd: „Þetta árið heldur maður með Íslandi.“ Og eins og í fyrra skiptið er emoji-andlitið með hjörtun látið fylgja með. Þetta er aðeins brotabrot af þeim færslum sem finna má við myndir Rúriks.

Rúrik kom inn á sem varamaður í leiknum gegn Argentínu í gær og stóð sig vel, eins og allt íslenska liðið. Þess má geta að aðrir leikmenn íslenska liðsins hafa bætt við sig fylgjendum á Instagram eftir leikinn í gær en enginn kemst þó með tærnar þar sem Rúrik Gíslason hefur hælana.

https://www.instagram.com/p/BirXraJgbt0/?taken-by=rurikgislason