Hannes Þór Halldórsson upplifði ótrúlegan leik í dag er Ísland gerði 1-1 jafntefli við Argentínu á HM.

Hannes varði vítaspyrnu frá Lionel Messi í leiknum eftir að Hörður Björgvin Magnússon hafði gerst brotlegur innan teigs.

,,Hann hefur sparkað annars staðar í öðrum leikjum. Ég hef skoðað mikið af vítaspyrnum frá honum og hafði sterka tilfinningu fyrir því að hann myndi setja hann þarna,“ sagði Hannes.

,,Þetta er allt hálf óraunverulegt ef ég á að segja eins og er. Við viljum ekki alveg fara á flug í lýsingarnar en þið getið rétt ímyndað ykkur hvernig það er að verja víti frá besta leikmanni í heimi í fyrsta leik Íslands á HM. Það er algjört rugl að þetta hafi gerst.“

,,Þetta er það besta sem gat komið fyrir mig að Hörður skyldi klippa hann niður þarna þannig að það væri frekar ég sem ætti að stjana við hann!“

Hannes var valinn maður leiksins af FIFA í dag og fékk verðlaun fyrir það. Sá bikar mun duga ef Ísland sækir ekki bara dolluna sjálfa í Rússlandi.

,,Ég fékk einhvern svona bikar sem lúkkar smá eins og HM bikarinn, ég tek hann heim og set hann upp á hillu ef við vinnum ekki sjálfan bikarinn.“