Gylfi Þór Sigurðsson gat alveg sætt sig við einn punkt í dag er Ísland mætti Argentínu á HM og gerði 1-1 jafntefli.

Gylfi viðurkennir að það sé erfitt að spila nauðvörn nánast allan leikinn og vill spila meiri sóknarbolta.

,,Þetta er frábær tilfinning. Þetta var mjög erfiður leikur, það var mikið um varnarhlaup og færslur og svo framvegis,“ sagði Gylfi.

,,Þetta eru jákvæð úrslit. Varnarleikurinn var frábær. Ég man ekki eftir neinu dauðafæri sem þeir sköpuðu sér.“

,,Auðvitað áttu þeir mikið af skotum og hálffærum og markið var frábært en við vörðumst vel sem lið á móti þessum leikmönnum.“

,,Ég myndi vilja spila meiri sóknarbolta, við myndum allir vilja það en við trúum allir á þetta.“

,,Við vitum að þetta getur náð í góð úrslit og þetta er okkar besti möguleiki á að ná í góð úrslit.“

,,Við erum sterkir í föstum leikatriðum og skyndisóknum og sérstaklega á móti svona þjóðum vitum við að við þurfum að verjast mjög vel.“

,,Þetta er svipað eins og í fyrsta leik gegn Portúgal á EM. Sigurinn gegn Englandi er sigur, þetta er bara einn punktur.“

,,Við erum gríðarlega sáttir, miðað við hvernig leikurinn spilaðist. Hannes ver víti og ég held að við höfum allir verið mjög ánægðir með hvernig við vörðumst.“

,,Við erum í nauðvörn 70% af leiknum og hin 30% erum við í venjulegri vörn. Þetta er rosalega erfitt og kannski óþarfi að vera svona mikið í vörn.“

,,Við vorum fínir fyrstu 30-35, við pressuðum á þá og settum smá spurningamerki við vörnina hjá þeim en þetta var allt öðruvísi í seinni hálfleik.“

,,Það er mjög mikið eftir. Markmiðið var að ná í stig hér í kvöld og við erum í fínum málum.“