Hörður Snævar Jónsson skrifar frá Moskvu:

,,Ég reyndi að halda kúlinu,“ sagði léttur, ljúfur og kátur, Alfreð Finnbogason þegar íslenskir fjölmiðlar ræddu við hann í kvöld eftir leikinn við Argentínu.

Alfreð skoraði fyrsta mark Íslands á HM þegar hann jafnaði leikinn gegn Argentínu og fagnaði vel.

,,Það er ekkert sem undirbýr mann undir svona augnablik, bara blackout þegar þetta gerist. Ég var ekkert með æft fagn, fór í eitthvað mix. Þetta var geðveik, ég er ekki búinn að ná orðunum í kringum þetta.“

Alfreð byrjaði leikinn en aðeins 433.is spáði því, aðrir miðlar töldu að Jón Daði Böðvarsson myndi byrja sem fremsti maður.

,,Ég fékk að vita þetta fyrir tveimur dögum, ég hafði góða tilfinningu. Ég kom þannig inn  í æfingar og æfingaleikina, setti skýr skilaboð. Ég hef sagt frá byrjun, ég finn allt annað traust frá þessum þjálfurum. Frá því að þeir (Heimir og Helgi Kolviðsson) tóku við,  það gefur framherja auka 50-60 prósent að vera með þjálfara sem stendur við bakið á þér. Þú veist að það er ekki klukkan að tifa á þér.“

,,Þú verður að vinna þér inn traustið, mér finnst ég hafa gert það. Sem framherji hjá Íslandi þá þarftu fyrst og fremst að vinna fyrir liðið, skila inn góðri vakt. Mörk eru bónus.“

,,Mér líður eins og ég skori í hverjum leik, tilfinning hefur verið þannig hjá Augsburg og svo undankeppnin síðasta. Síðustu leikjum gengið vel líka. Undirbúningurinn var eins og ég hafði óskað mér fyrir HM“

Íslenska liðið var afar rólegt eftir leik þrátt fyrir mögnuð úrslit. ,,Þetta er fyrsta skrefið, markmiðið er að komast upp úr riðlinum. Fáum vind í bakið við þessi úrslit, við þurfum að njóta í kvöld og á morgun byrjar undirbúningur fyrir Nígeríu.“