Heimir Hallgrímsson, landsliðsþjálfari Íslands, segir að liðið muni ekki hræðast neinn mótherja fari svo að við komumst í 16-liða úrslit.

Þetta segir Heimir í athyglisverðu viðtali við breska blaðið Guardian.

„Riðillinn okkar er jafn og ég held að það gagnist okkur. Ef eða þegar – ég veit ekki hvort orðið ég á að nota – þá munum við ekki mæta mótherja sem er mikið sterkari en Argentína, Nígería eða Króatía. Það gefur manni þá tilfinningu, ef við komumst í 16-liða úrslit, að við ættum ekki að óttast neinn.“

Heimir segir að íslenska liðinu séu engin takmörk sett. Heimir ræðir einnig um dvalarstað Íslands meðan á HM stendur, Gelendzhik við Svartahaf, þar sem vel fer um íslenska liðið.

„Þetta er rólegur staður, sólríkur og það er orka á honum sem við getum tekið frá sjónum og fjöllunum í kring. Hann hefur allt sem við leituðum að.“