Íslenska landsliðið getur ekki borðað íslenskan mat í Rússlandi vegna viðskiptabanns Rússa á vörur frá Íslandi. Bannið hefur verið í gildi í þrjú ár, eða eftir að Ísland mótmælti innrás Rússa Krímskaga.
Þó að íslenski maturinn sé ekki í boði er vel hugsað um strákana. Tveir kokkar sjá um að elda fyrir íslenska liðið en í Frakklandi sá aðeins einn kokkur um eldamennskuna. Rússi að nafni Kirill, sem búsettur er á Íslandi en á rætur að rekja til Gelendzhik, er með í ferðinni sem og kokkur að nafni Hinni.
Í samtölum forsvarsmanna KSÍ við fjölmiðlamenn í morgun kom fram að kokkarnir þyrftu að keyra í um klukkustund eftir því að fá það hráefni sem þeir helst vilja fyrir íslenska liðið. Það hefur verið einhverjum vandkvæðum bundið að nálgast ferskan fisk en maturinn sem íslenska liðið fær er góður og hafa landsliðsmenn hrósað kokkunum í hástert.
Íslenski kokkurinn ferðast með liðinu til Moskvu á fimmtudag og sér til þess að leikmenn fái fyrsta flokks næringu í aðdraganda leiksins á laugardag. Kirill verður aftur á móti eftir í Gelendzhik og sér til þess að liðið fái vel að borða eftir leik.
