Guðmundur Steingrímsson, fyrrverandi þingmaður, segist fagna því að heimsmeistaramótið í fótbolta sé senn að hefjast. Hann bendir hins vegar réttilega á að til séu þeir sem hafa ekki snefil af áhuga á fótbolta. Næstu vikur gætu því orðið krefjandi fyrir þann hóp.
„Hvernig á þetta fólk að haga sér næstu vikurnar? Verður lífið óbærilegt?“ Þessum spurningum og fleiri veltir Guðmundur fyrir sér í pistli í Fréttablaðinu í dag. Þar reynir hann eftir fremsta megni að gefa áhugalausum góð ráð um það hvernig þeir eiga að haga sér næstu vikurnar.
„Ég veit ekki hversu skynsamlegt það er fyrir þetta fólk að reyna að vera fúlt á móti. Ég held að það berjist enginn við þessa flóðbylgju. Það verður talað um „strákana okkar“ sem mun sjálfsagt fara í taugarnar á einhverjum. Réttara er auðvitað að segja „strákarnir“, en ég held að enginn muni mæta á málþing um það. Mín fyrsta ráðlegging til þessa fólks, sem ég hef fulla samúð með, er að reyna að hafa gaman af þessu,“ segir Guðmundur og nefnir atriði sem hann sá á Listahátíð á dögunum.
„Ég sá kanadískan dansflokk leika rollur á Listahátíð nú um helgina. Það var virkilega fyndið og skemmtilegt og mjög spennandi. Maður velti fyrir sér hvað rollurnar myndu gera næst. Maður sökk inn í atriðið. Fótbolti er ekki ósvipaður. Það má opna hugann fyrir honum einsog öðru.“
En hvað á þá að gera ef þessi nálgun virkar ekki? Guðmundur segir að á meðan helmingur þjóðarinnar og hinn helmingurinn í Rússlandi, eða því sem næst, verða fáir á ferli, til dæmis á laugardag þegar Ísland og Argentína mætast.
„Maður getur æft flugsund eins og brjálæðingur. Jafnvel á sprellanum. Ef maður er haldinn þörf til að ganga um í Kringlunni í Spidermanbúningi, verður gott tækifæri þá. Næstu vikur verða líka góðar til að gera ýmislegt, sem fólk vill kannski koma í framkvæmd svo lítið ber á. Koma út úr skápnum, fá sér húðflúr, hætta á Facebook, skipta um hárgreiðslu. Í pólitíkinni geta líka ótal tækifæri skapast: Ganga úr Nató, taka upp nýjan gjaldmiðil, samþykkja áfengi í matvöruverslanir, eyða gögnum,“ segir Guðmundur sem endar pistilinn á þessum orðum:
„Ísland verður líklega aldrei eins aftur.“
