Þar kemur meðal annars í ljós að 75% leikmanna í Bestu deild karla telja að tíðni veðmála meðal leikmanna sé mikil eða mjög mikil, 58% hafa sjálfir veðjað á fótboltaleiki og 10% hafa fundið fyrir vanlíðan vegna þátttöku í veðmálum.
„Þetta sýnir svart á hvítu að við verðum að bregðast við – ekki seinna en strax,“ segir Birgir í aðsendri grein á vef Vísis þar sem hann fjallar um málið.
Birgir bendir á að veðmál geti verið saklaus skemmtun en þau geti líka eyðilagt trúverðugleika íþrótta og haft alvarleg áhrif á líf leikmanna. Segir hann að nú verði brugðist við með fræðslu sem mun verða skylda fyrir alla leikmenn.
Í grein sinni bendir Birgir á að hjá ÍTF, sem eru hagsmunasamtök félaga í efstu deildum karla og kvenna, hafi lengi verið lögð áhersla á að tryggja að deildirnar séu hreinar af veðmálasvindli og að þátttaka í veðmálum sé ábyrg.
„Ég vil því halda þessari mikilvægu umræðu áfram og segja frá því sem við höfum gert til að sporna við vandanum – og hvetja aðrar deildir og íþróttagreinar til að skoða eigin aðgerðir,“ segir hann og nefnir að í mörgum löndum hafi veðmálavæðing orðið til þess að trúverðugleiki úrslita er í hættu.
„Því miður eru dæmi um að leikmenn, dómarar og aðrir innan íþróttanna hafa tekið við mútum eða ábendingum um að hagræða úrslitum. Okkur sem höfum metnað og ástríðu fyrir íslenskum íþróttum er ljóst að við megum ekki láta þetta gerast hér,“ segir hann og vísar svo í fyrrnefnda könnun sem ÍTF gerði. Segir hann að skoðaðar hafi verið fyrirmyndir erlendis og lausn fundist í Svíþjóð sem aðlöguð verður að Íslandi.
„Þar hefur verið þróuð fræðsla fyrir leikmenn um hagræðingu úrslita og ábyrga þátttöku í veðmálum. Fræðslan er gagnvirk, krefst þess að spurningum sé svarað og tryggir þannig að leikmenn tileinki sér efnið. Þessi fræðsla hefur nú verið þýdd á íslensku og aðlöguð að reglugerðum hérlendis,“ segir hann og bætir við að fræðslan skiptist í tvo hluta. Annars vegar um hagræðingu úrslita, hvað það er, hvernig hún á sér stað og hvers vegna hún eyðileggur íþróttina, og hins vegar um ábyrga þátttöku í veðmálum, áhættu, einkenni spilafíknar og hvar hægt sé að leita sér hjálpar.
„Allt efnið er aðgengilegt á netinu fyrir leikmenn, bæði í síma og tölvu, svo leikmenn geti farið í gegnum fræðsluna þegar þeim hentar. Við höfum þegar kynnt efnið fyrir liðunum og fengið mjög jákvæð viðbrögð,“ segir hann og bætir við að áætlunin til framtíðar sé að gera eins og Svíar, það er að fræðslan verði skylda fyrir alla leikmenn sem vilja spila á efsta stigi í knattspyrnu á Íslandi. Þannig sé tryggt að allir sem stíga inn á völlinn hafi skýra mynd af áhættunni og ábyrgðinni.
„Við hjá Íslenskum toppfótbolta viljum standa vörð um trúverðugleika íþróttanna. Við viljum að fólk geti treyst því að úrslit ráðist á vellinum – ekki í símtali eða skilaboðum fyrir leik.
Ég hvet því alla sem starfa innan íþróttahreyfingarinnar til að taka þátt í þessari umræðu og skoða hvaða ráðstafanir þeir geta gert í sínum greinum. Þetta snýst ekki bara um knattspyrnu, þetta snýst um heiðarleika, heilbrigði og framtíð íþróttanna á Íslandi.
Við verðum að spila rétt úr stöðunni,“ segir hann að lokum.
