Enn er möguleiki á því að Xavi verði áfram stjóri Barcelona á næstu leiktíð. Spænski miðillinn Mundo Deportivo segir frá þessu.

Xavi tilkynnti í vetur að hann myndi láta af störfum eftir tímabilið en æðstu menn hjá félaginu, þar á meðal forsetinn Joan Laporta, vilja ólmir halda honum.

Samkvæmt spænska miðlinum er Xavi þó með kröfur, eigi hann að vera áfram.

Í fyrsta lagi vill hann loforð um að ekkert stórt nafn fari frá félaginu í náinni framtíð. Seinni krafan tengist einnig leikmannamarkaðnum því Xavi vill fá stórt nafn í leikmannahóp sinn í sumar.

Menn eins og Joshua Kimmich, Bernardo Silva og Martin Zubimendi hafa allir verið nefndir til sögunnar.