Árum saman hefur Taíland ekki þurft að auglýsa sig mikið sem ferðamannaland. Fólk frá öllum heimshornum hefur streymt þangað til að njóta fallegra stranda, grænna regnskóga og líflegs götulífs.

En ferðamönnum hefur fækkað mikið að undanförnu og nú ætla stjórnvöld að grípa til aðgerða til að spyrna við fótunum. Euronews segir að á næstu þremur mánuðum verði 200.000 ókeypis flugmiðum deilt út. Þeir gilda í innanlandsflug í Taílandi.

Ferðamenn munu fá ókeypis flugferð innanlands, fram og til baka. Þetta er auðvitað auglýsingabrella en um leið aðferð til að dreifa ferðamönnum meira um landið og sýna þeim að það eru fleiri góðir staðir en Phuket, Bangkok og Chiang Mai sem eru þess virði að heimsækja.

Ferðamenn munu eiga rétt á flugmiða ef þeir kaupa sér flugmiða til Taílands í gegnum ferðaskrifstofur eða hjá flugfélögum. Þeir sem hafa nú þegar keypt sér flugmiða, munu ekki njóta góðs af þessu.

Herferðin hefst á mánudaginn og stendur yfir út nóvember. Sá fyrirvari er þó á þessu að ríkisstjórnin á enn eftir að leggja blessun sína yfir þetta.

Tæplega 40 milljónir ferðamanna heimsóttu Taíland 2019. Í ársbyrjun 2025 töldu ferðamálayfirvöld, sem voru kannski svolítið bjartsýn, að 39 milljónir myndu heimsækja landið í ár. Nú er búið að lækka töluna í 33 milljónir og vafi þykir leika á hvort þessi tala sé raunhæf. Það sem af er ári hefur 21 milljón ferðamanna lagt leið sína til landsins.