Fyrir þetta fólk eru sjónvörp, hlaðvörp og hljóðbækur ekki truflandi heldur svæfandi.
Rannsókn, sem var birt 2018, sýndi að helmingur þeirra, sem glíma við svefnvandamál, notar tónlist sem hjálparmeðal.
Dr. Rachel Salas, sérfræðingur í svefnrannsóknum og prófessor í taugafræði við Johns Hopkins háskólann, segir að þetta snúist um jafnvægi að sögn CNN.
Það sem virkar fyrir einn, virkar ekki endilega fyrir annan og þrátt fyrir að maður eigi ekki að horfa á skjá skömmu fyrir háttatíma, þá gegnir það allt öðru máli ef þú hlustar bara.
Dr. Shalini Paruthi segir að það verði þó að hafa í huga að ekki sé öll hljóð góð fyrir svefninn, það eigi að forðast hljóð sem halda athygli fólks. Ef þau eru of spennandi, þá haldi þau fólki vakandi og þá sé vandinn óleystur.
Gott ráð er að velja eitthvað sem þú hefur heyrt áður. Eitthvað fyrirsjáanlegt, eintóna eða langdregið. Svæfandi sögur eða þekktar þáttaraðir, sem bjóða ekki upp á æsispennandi endi, virka oft best að sögn Dr. Paruthi.
Dr. Lindsay Browning, svefnsérfræðingur og prófessor, ráðleggur fólki að forðast bækur og þætti sem það vill gjarnan einbeita sér að. Þeim mun meira sem maður einbeiti sér að því að hlusta þeim mun erfiðara verði að slíta sig frá hlustuninni og sofna.
