Ung móðir heldur því fram að henni hafi verið haldið gegn vilja sínum á kaffihúsi eftir að þriggja ára dóttir hennar ýtti marmaraborði um koll og braut það. Borðið var að verðmæti 1.600 dala eða um 195 þúsund krónur.

Atvikið átti sér stað á Hazelnut Cafe í Lavallette í New Jersey í Bandaríkjunum. Í öryggismyndavél má sjá stúlkubarnið berja borðið með fætinum á meðan móðir hennar, Kathy Denman, beið í röð til að borga fyrir kaffið og ísinn þeirra. Móðir Denman, 76 ára, var með þeim og sat hjá barninu.

„Ég var algjörlega niðurlægð og vandræðaleg,“ segir Denman í myndbandi á TikTok. Bætir hún því við að hún hafi grátið síðan atvikið átti sér stað, sem olli því að næstum 50 kílóa marmaraborðið hrundi til jarðar.

@beautihut Broken table: $1600 – shame, embarssement, and mean girls robbing your dignity: priceless. I know I wasn’t put together and dolled up, but couldnt you have been just a bit kind? #meangirls #badbusiness #embarrassing #kidsoftiktok #momsoftiktok #needadvice #venting #rant #momlife #fyp ♬ original sound – Beautihut

Denman hélt því fram að stjórnendur kaffihússins hefðu sagt henni að hún „fengi ekki að fara“ fyrr en hún hefði gefið upp ökuskírteini sitt og kreditkortaupplýsingar til að greiða fyrir borðið, þrátt fyrir að hafa strax boðist til að greiða fyrir skemmdirnar. Segir Denman að síðar hafi einn eigenda kaffihússins sagt við hana í símtali: „Stefna okkar er: Þú brýtur það, þú borgar fyrir það.“

Segist hún hafa verið í 20 mínútur í viðbót á staðnum meðan viðskiptavinir hjálpuðu til við að tína upp brot borðplötunnar. Enginn slasaðist við atvikið.

Síðan óhappið átti sér stað birti Denman, yfirlýsingu á TikTok þar sem hún sagði að hringt hefði verið frá kaffihúsinu og hún beðin afsökunar á „hvernig komið var fram við fjölskyldu okkar,“ skrifaði hún. „Við viljum halda áfram friðsamlega og viljum ekki tjá okkur frekar um þetta mál.“

Kaffihúsið birti yfirlýsingu á Instagram-síðu sinni þar sem þeirra hlið var lýst.

„Eftir atvikið hringdum við persónulega í móður barnsins til að lýsa yfir áhyggjum okkar, bjóða fram stuðning okkar og deila beinum samskiptaupplýsingum okkar ef hún þyrfti á einhverju að halda. Sem viðbótarvarúðarráðstöfun höfum við síðan fjarlægt öll borð af stöðum okkar til að útiloka alla hættu á svipuðum atvikum.“

Fullyrða eigendurnir að þeim mæðgum hafi ekki verið meinað að yfirgefa staðið og segja þeir að Denman verði ekki kærð fyrir skemmdirnar.
„Við erum afar þakklát fyrir að þriggja ára stúlkan, amma hennar, móðir og allir viðskiptavinir sem voru viðstaddir séu óhultir og ómeiddir.“

Hazelnut Cafe er hluti af Hazel Boutique, heimilisvöru- og fatamerki með fjórar verslanir í New Jersey. Það er í eigu tvíburasystranna Kimberly og Jennu Campfield.