Athena Georgopoulos, 39 ára, fannst látin á heimili sínu í Melbourne í Ástralíu á mánudagskvöld eftir að lögreglunni var tilkynnt að öskur bærust frá húsinu. Athena var barnshafandi og er talið að hún hafi verið gengin fimm mánuði. Maki hennar, hinn fimmtugi Andrew Gunn, fannst einnig látinn. Höfuð hans hafði verið skorið af búknum og fest á staur.

„Nóg er nóg“, „karma er ekki með neinn matseðil“, „svik, ófyrirsjáanlegt, óhjákvæmilegt“ og „kjöt er morð“ hafði verið skrifað á húsveggina utanverða. Lögreglan er að rannsaka hvort textinn tengist morðunum.

34 ára karlmaður var handtekinn á lestarstöð, um 6 km frá morðvettvanginum, á öðrum tímanum aðfaranótt þriðjudags.

Lögreglan segist telja að Athena og Andrew hafi þekkt morðingjann. Þau höfðu verið par í nokkur ár.

Patty Dilveridis, frænka Athena, sagði Brisbane Times að Athena hafi verið full tilhlökkunar yfir að eiga von á barni því hún hafi verið orðin 39 ára og hafi talið að hún myndi ekki eignast barn.