Flestir kannast eflaust við gervigreindarforritið ChatGPT og margir nota það. Að undanförnu hafa margar sögur verið á kreiki um hvernig gervigreind hefur tekið að sér að veita fólki ráð tengd heilsu þess. En þessi ráð eru ekki alltaf góð.

Því fékk sextugur Bandaríkjamaður að kenna á þegar hann leitaði sér ráða hjá ChatGPT.

Maðurinn hafði lesið um neikvæð áhrif natrínklóríðs, sem er bara venjulegt borðsalt, á heilsuna. Hann ákvað því að leita ráða hjá ChatGPT um hvernig hann gæti forðast að neyta salts.

Forritið sagði honum að hann gæti tekið natríumbrómíð í þrjá mánuði en tók ekkert fram um þá heilsufarsáhættu sem því fylgir.

Maðurinn ákvað að fylgja þessu ráði og lá leiðin bara beint niður á við í kjölfarið því hann þróaði með sér brómeitrun. Þessi sjúkdómur var vel þekktur í byrjun tuttugustu aldarinnar og segir The Guardian að talið sé að hann hafi átt hlut að máli varðandi innlögn næstum því tíunda hvers sjúklings á geðdeild á þeim tíma.

Sjúkdómnum fylgja bæði lífeðlisfræðileg og taugasálfræðileg einkenni. Í tilfelli mannsins voru það ofsóknaræði og ofskynjanir.

Hann var að lokum lagður inn á geðdeild.

Fjallað er um málið í vísindaritinu Annals of Internal Medicine og benda höfundar greinarinnar á að málið sé dæmi um hvernig gervigreind geti látið frá sér ónákvæmar upplýsingar og kynt undir dreifingu rangra upplýsinga.