Á síðustu sex árum hefur hermönnum í suðurkóreska hernum fækkað um 20% og eru þeir nú 450.000. Varnarmálaráðuneytið segir að ástæðuna megi rekja til fækkunar karlmanna á herskyldualdri.

Ástæðan fyrir fækkun karlmanna á herskyldualdri er að fæðingartíðnin í landinu er lág en hver kona eignast að meðaltali 0,75 börn og það er auðvitað ávísun á fólksfækkun.

Að mati varnarmálaráðuneytisins þurfa 500.000 hermenn að vera undir vopnum til að tryggja nauðsynlegar varnir landsins gegn norðurkóreska hernum en talið er að 1,3 milljónir manna séu í norðurkóreska hernum.

Herskylda er í Suður-Kóreu en landið á formlega séð enn í stríði við Norður-Kóreu.