Fjölmiðlamaðurinn Tucker Carlson hefur undanfarið verið neikvæður í garð Donald Trump Bandaríkjaforseta. Einkum má rekja þetta til ólíkra skoðana þeirra á átökum Ísrael og Írans, en Carlson þykir Trump hafa fengið alltof langt í daðrinu við Ísrael og þá sérstaklega með því að taka beinan þátt í átökunum með því að varpa sprengjum á kjarnorkuinnviði Írans.

Trump hélt því þó fram að Carlson hefði séð að sér og beðið hann afsökunar. „Hann hringdi og baðst afsökunar um daginn því honum fannst hann hafa sagt hluti sem gengu aðeins of langt, og ég kunni að meta afsökunarbeiðnina,“ sagði Trump við blaðamenn í lok júní.

Carlson segir nú í viðtali við þýska miðilinn Bild að þarna hafi forsetinn hallað réttu máli. Ritstjóri Bild, Paul Ronzheimer, spurði hvort Carlson hafi hringt í Trump til að biðjast afsökunar. „Ok, nei,“ sagði fjölmiðlamaðurinn. „Nei, ég get sko sagt eitt… mér er slétt sama. Ég kann virkilega vel við Trump. Ég tók þátt í kosningabaráttunni hans. Bara svo það komi fram þá er ég sammála Trump, ég hef verið sammála honum um baráttumálin.“

Carlson tók fram að þó að meint símtal hafi aldrei átt sér stað þá geti hann alveg séð fyrir sér að hringja í forsetann og biðjast afsökunar. „Það væri mér sönn ánægja,“ sagði Carlson og tók fram að hann sé meðvitaður um það þegar hann gengur yfir strikið. „Ég lít ekki á mig sem guð svo mér er það sönn ánægja að biðjast afsökunar. Þú getur spurt alla sem þekkja mig, ég biðst afsökunar.“

Ronzheimer spurði fjölmiðlamanninn þá hvort hann væri þar með formlega að biðjast afsökunar í viðtalinu við Bild. „Ég veit ekki hverju ég ætti að biðjast afsökunar á. Ég réðst ekki á Trump þarna. Ég var ósammála honum. Ég sé ekki að nokkuð hafi verið sagt sem gefur tilefni til afsökunarbeiðni.“