Georgia Lowe, 27 ára, hefur verið svipt kennsluréttindum ævilangt fyrir að senda myndir af sér, á nærfötunum einum saman, til 15 ára nemanda. Hún var þá kennari við Kingsmead skólann í Hednesford í Staffordshire á Englandi. Það var móðir piltsins sem komst að myndasendingunum og gerði skólayfirvöldum viðvart.

Þegar yfirvöld rannsökuðu málið kom í ljós að samband Lowe og piltsins hófst 2021, nokkrum mánuðum eftir að Lowe hóf störf í skólanum. Samband þeirra var þó eingöngu í formi skilaboðasendinga, oft með ansi djörfum texta.

Þegar upp komst um þessar skilaboðasendingar í október var hún rekin úr starfi. En hún setti sig aftur í samband við piltinn og sendi honum myndir af sér á nærfötunum einum saman.

Auk þess að missa kennsluréttindin að eilífu var hún dæmd í 14 mánaða skilorðsbundið fangelsi fyrir skilaboðasendingarnar. Hún þarf einnig að sækja endurhæfingarnámskeið í 20 daga og vinna 120 klukkustundir í þegnskylduvinnu.