Niðurstöður nýrrar rannsóknar sýna að ef ekki verður gripið til samhæfðra aðgerða gegn ofurbakteríum og ónæmi gegn þeim, þá geti milljónir manna látist og tjónið á heimsvísu gæti numið sem svarar til 220 milljarða íslenskra króna á ári næstu 25 árin.

The Guardian skýrir frá þessu og segir að þetta muni koma allra verst niður á Bandaríkjunum, Bretlandi og Evrópusambandinu. Hafa sumir gagnrýnt niðurskurð þróunaraðstoðar þessara ríkja og segja að það geti haft alvarleg áhrif í baráttunni við ofurbakteríur.

Nú síðast tilkynnti breska ríkisstjórnin að hún muni hætta stuðningi við baráttuna gegn sýklalyfjaónæmi í lág- og millitekjulöndum.

Mörg önnur Evrópuríki hafa einnig skorið niður fjárlög til þróunaraðstoðar og það sama á við um Bandaríkin.